CEL

• 

Empresarios de Lugo participaron onte en Buenos Aires (Arxentina) no Campionato Mundial de Carnes (CMDC) 2025, un evento de carácter internacional organizado co obxectivo de difundir, recoñecer e premiar a calidade da carne a nivel global, promovendo a excelencia na súa produción e situando aos mellores cortes do mundo como vehículo de creación de valor no sector cárnico. 

Lugo e Ávila son os únicos territorios españois con representación no Campionato. O conselleiro delegado da CEL e CEO de Embutidos Montepicato, Eduardo Valín, e o secretario xeral da Confederación de Empresarios de Lugo (CEL) e presidente da Cámara de Comercio de Lugo, Jaime López, son os representantes lucenses neste foro, que ten como obxectivo primordial que a carne adquira condición de produto de maior valor engadido, á vez que conecta a toda a cadea de valor (produtores, industria, gastronomía e consumidores) e promove a mellora continua coa calidade como bandeira.  

A participación de Lugo neste evento é unha das actividades iniciais da apertada axenda da Misión Empresarial a Arxentina e Uruguai organizada pola Confederación de Empresarios de Lugo co financiamento da Deputación de Lugo, que terá lugar coa participación de diferentes empresas de Lugo nas próximas semanas, e que busca mellorar o posicionamento da provincia nestes dous mercados latinoamericanos.

A participación da representación lucense no Campionato Mundial de Carnes xorde das actividades preparatorias da Misión pilotadas pola CEL nos últimos meses, como a xornada - país sobre o mercado da República de Arxentina organizada pola CEL, tamén co financiamento da Deputación de Lugo, no pasado mes de setembro. 

Desde a CEL considérase que este tipo de eventos promoven o establecemento de lazos máis estreitos e duradeiros entre as empresas relacionadas cun sector cárnico arxentino xa recoñecido e punteiro a nivel internacional, e as empresas lucenses do sector cárnico, cun produto de calidade excelente que require dun maior recoñecemento do seu valor a nivel exterior, así como con axentes de interese que operan xa a nivel internacional.

CMDC 2025

O Campionato Mundial de Carnes 2025 é un evento promovido por entidades como Americarne, unha das principais plataformas e publicación dixital do sector agroalimentario de América Latina, ou Messe Frankfurt, unha das maiores organizadoras de feiras, congresos e eventos a nivel mundial, que conta cun gran recinto feiral propio en Frankfurt (Alemaña) e delegación especial en Arxentina, entre outros.